గెలుతు షాభా.......

........నాశనాలూ

తెలుగు భాషాభివృధ్ధి మాటేమోగానీ, మా ఇంట్లో అందరూ గెలుతు షాభ బాగా నేర్చుకొని, దాన్ని వుపయోగిస్తూ, బాగా అభివృధ్ధి చేసుకుంటాము.

ఈ మధ్య తానా, తంతా ల్లా మనం కూడా అమెరికాలో ఓ గెలుతు సంఘం ప్రారంభిస్తే యెలా వుంటుంది? ప్రపంచ గెలుతు మహాసభలు జరిపించచ్చుకదా? లాంటి ప్రతిపాదనలు కూడా వచ్చాయి. పేరు "గానా" (గెలుతు అసోసియేషన్ ఆఫ్ నార్త్ అమెరికా) అనిపెడితే బాగుంటుంది అనికూడా నిశ్చయించారు.

ఇంక కార్య రంగంలోకి దూకడమే తరువాయి. కానీ ప్రపంచవ్యాప్తంగా గెలుతు మాట్లాడేవాళ్లనందరినీ వివరాలు సేకరించడం, ఓ వేదిక మీదికి తీసుకురావడం చాలా కష్టమైన పని. కానీ అసాధ్యం కాదు కదా అనికూడా అంటున్నారు.

ఇంతకీ ఈ టపా యెందుకంటే--గెలుతు భాష కూడా కాలానుగుణ్యంగా యెలా మార్పు చెందుతుందో ఓ చిన్న వుదాహరణ వ్రాయడానికి.

మామూలు తెలుగు లో "స్నానం" అంటే అందరికీ తెలుసు. అది గెలుతులో "నాస్నం" అవుతుంది. అది వాడుక క్రమంలో "నాశనం" గా రూపాంతరం చెందింది ఇప్పటికే. 

ఈ నాశనాల్లో కొన్ని రకాలు వున్నాయి.

యమర్జంటుగా పూర్తి చెయ్యడాన్ని--"కాకి నాశనం" అంటారు. అంటే ముక్కూ మొహం నీళ్లతో కడిగేసి, రెక్కలతో పైపైన నీళ్లు జల్లేసుకొని, తుడిచేసుకోవడమే. 

ఇంకోటి "అర్ధ నాశనం". ఇదికూడా యెమర్జెంటుగా కాకపోయినా, అర్జెంటుగా ముగించడానికి. అంటే, మొహమూ, శరీరం పైభాగం చేతులతో సహా నీళ్లతో కడిగేసి, కాళ్లుమాత్రం కడుక్కొని, తుడిచేసుకోవడం.

మరోటి "మాలూము నాశనం". ఇది సామాన్యంగా రోజూ 'మామూలుగా' చాలామంది చేసేదే. అంటే బాత్రూములో శుభ్భరంగా వొళ్లంతా రుద్దుకుంటూ, తలతడవకుండా చేసేది.

తరవాతది "సర్వ నాశనం". ఇందులో తలకూడా కుంకుడుకాయల పులుసుతోనో షాంపూతోనో రుద్దుకుంటూ, పూర్తిగా స్నానించడం. ఇది మామూలుగా వారానికోసారి చేస్తారు చాలా మంది.

ఇక యెప్పుడో తప్పనిసరిగా చేసేది "టబ్బ నాశనం". దాన్నే తెలుగులో "సచేల స్నానం" అంటారు. యెవరిదైనా మరణవార్త విన్నప్పుడో, పార్థివ శరీరాన్ని చూసి వచ్చినప్పుడో--ఇలా ఇంటి బయటే నూతిలోంచి నీళ్లు తోడుకొని కట్టు బట్టలు తడిసేలా చేసేది.

సరదాగా అందరితో పంచుకోవాలని వ్రాశాను. ఇంకెవరైనా ఇంకేమైనా వెరైటీలు వ్రాస్తే వ్రాయండి.

ఇంతకీ మీ సర్వనాశనం యెప్పుడు?

శుభం.